Kosova ka arritur një barazim të madh 2:2 ndaj Zvicrës në “Fadil Vokrri” në kuadër të kualifikimeve për Kampionatin Evropian.
Në një stadium të mbushur plot, zviceranët u pritën ngrohtësisht nga “dardanët”, përveç Uran Bislimit, i cili u vërshëllye nga ta.
Kjo pasi që ai së fundmi zgjodhi të luajë për “helvetikët”, duke braktisur Kosovën.
Zviceranët arritën të kalonin në epërsi qysh në minutën e 14-të, kur Freuler realizoi pas një aksioni të bukur.
Me epërsi minimale, Zvicra shkoi në pushimin mes pjesëve.
Në pjesën e dytë, Kosova pati iniciativë më të madhe, e cila u shpërblye me gol në minutën e 65-të nga Vedat Muriqi që realizoi me kokë.
Megjithatë, në momentin më të mirë tonin erdhi goli i dytë i Zvicrës.
Goditja e Freuler u devijua nga Amir Rrahmani për të përfunduar në rrjetë.
E në minutat shtesë, Vedat Muriqi realizoi edhe një herë për ta barazuar rezultatin. Ai u asistua bukur nga Meriton Korenica.
Kësisoj, me këtë barazim Zvicra mbetet e para me 11 pikë, e ndjekur nga Rumania me tetë dhe Izraeli me tetë.
Kosova mbetet e parafundit me vetëm katër pikë nga pesë ndeshje.
Dueli i radhës i ekipit të drejtuar nga Primoz Gliha do të jetë pas tri ditëve në udhëtim ndaj Rumanisë.
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
