Pas fitores së parë, djemtë e trajnerit Mehmed Kurda kanë arritur edhe fitoren e dytë radhazi, duke mposhtur me rezultat 2:1 kombëtaren e Andorrës në një ndeshje të dominuar nga Dardanët e rinj.
Në këtë përballje, heroi i padiskutueshëm ishte sulmuesi i talentuar Unejs Mustafa. Ai ishte ai që vulosi fitoren e Kosovës me dy gola të shkëlqyera. Goli i parë erdhi në minutën e 40-të, duke zhbllokuar rezultatin dhe duke i dhënë epërsinë Kosovës para pushimit të pjesës së parë.
Në fillim të pjesës së dytë, vetëm tre minuta pas rifillimit të lojës (minuta e 48-të), Mustafa shënoi golin e dytë personal dhe të ekipit, duke e dyfishuar epërsinë dhe duke e vënë ndeshjen nën kontrollin e Kosovës. Andorra arriti të ngushtojë rezultatin, por loja e organizuar dhe karakteri i treguar nga futbollistët kosovarë bënë që rezultati të mos ndryshonte deri në fund.
Pas përfundimit të ndeshjes, protagonisti i ditës, Unejs Mustafa, nuk e fshehu lumturinë për kontributin e tij në këtë fitore të rëndësishme. “Jam shumë i lumtur që i kam dhënë dy gola. Është fitorja e dytë me Kombëtaren e Kosovës dhe shpresoj të ecim kështu. Besoj se edhe në ndeshjen e tretë kundër Shqipërisë do të arrijmë sukses”, u shpreh Mustafa për Telegrafin.
Me dy fitore në dy ndeshje, Kombëtarja e Kosovës U16 po tregon potencial të madh dhe po dëshmon se e ardhmja e futbollit kosovar është e ndritur. Tani, sytë janë drejtuar nga ndeshja e radhës kundër Shqipërisë, e cila pritet të jetë një sfidë tjetër interesante për këta djem të talentuar.
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
