Të veshur me lëkura të përpunuara kafshësh, me maska në fytyrë dhe kambana pjesëmarrësit e karnavalit Ilir të Bozovcës së Tetovës, defiluan nëpër fshatin Bozovcë. Karnavalet Ilire në Bozovcë të Malësisë së Tetovës, sipas organizatorëve kanë për qëllim që të rruajnë traditat e lashta ilire.
Qëllimi i këtij karnavali është që të ruhet kultura, tradita dhe lashtësia jonë. Përmes atyre maskave tregojmë veshmbathjen tonë, kulturën tonë se në këto vise të larta si blegtorë i kemi përdorur Plafin, Gëzofin – tha Neshat memedi, organizator.
Në këtë dhjetë vjetor të karnavalit të Bozovcës, nuk munguan edhe studiuesit e etnologjisë dhe albanologjisë, sidomos nga Universiti i Tiranës dhe ai i Prishtinës, për t`u njohur nga afër me vlerat e këtij manifestimi.
Një manifestim mjaft interesant, me vlera të lashtësisë sonë, që kuptueshëm shkojnë deri në kohët Ilire – u shpreh Hysen Matoshi, albanolog nga Universiteti i Prishtinës.
Karnavali Ilir, më parë është realizuar edhe në disa fshatra tjerë të malësisë së Sharrit, si në Shipkovicë, Lisec e Veshallë, por, me kalimin e kohës, karnavali ka mbijetuar vetëm në fshatin Bozovcë, ku vazhdojnë ta rruajnë edhe më tej këtë festë pagane ilire.
Bashkim Sulejmani
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
