Federata e Futbollit të Kosovës ka njoftuar rreth projekteve të cilat janë duke u zhvilluar në infrastrukturën e stadiumeve në komunën e Prizrenit.
Sipas njoftimit nga FFK, në fshatin Gjonaj fusha me bari sintetik veçse është në fazën finale, derisa në Zhur dhe Dragash faza e parë e punimeve ka përfunduar ku pritet që së shpejti të filloj faza e dytë.
FFK po ashtu ka bërë të ditur se projekte si këto janë në bashkëfinancim me komunat, mbështetur nga programi UEFA HatTrick ku është paraparë të realizohet në të gjitha regjionet e Kosovës. Kurse, qëllimi i projekteve në fjalë është t’u ofrojë të rinjve nga Kosova hapësira sportive, përkatësisht fusha të futbollit bashkë me objektet përcjellëse.
Postimi i plotë:
Federata e Futbollit e Kosovës me shumë përkushtim po vazhdon implementimin e projekteve të cilat janë paraparë të realizohen brenda ciklit katërvjeçar. Si një nga më të rëndësishmit pa dyshim është projekti për zhvillimin e infrastrukturës në bashkëpunim me komunat, i cili ka gjetur zbatim të mirë në praktikë. Pas memorandumeve të nënshkruara në mes krerëve ndërinstitucional, punët janë kryer me intensitet të shpejtë. Projekti në bashkëfinancim me komunat, e i cili është mbështetur nga programi UEFA HatTrick është paraparë të realizohet në të gjitha regjionet e Kosovës.
Qëllimi i këtij projekti është t’u ofrojë të rinjve nga mbarë Kosova hapësira sportive, përkatësisht fusha të futbollit bashkë me objektet përcjellëse, në të cilat ata do të mund të aplikojnë lojën e futbollit, të zhvillohen kategoritë e reja dhe të mundësohet një përfshirje sa më e madhe e fëmijëve të të dy gjinive në këtë sport. Gjatë një periudhe të shkurtër është arritur të punohet në realizimin e këtij projekti në disa vende. Fushat me bari sintetik në qytete të ndryshme të Kosovës thuajse kanë përfunduar, ndër to janë fusha në Brestovik të Pejës, e cila është në fazën finale, ashtu siç është edhe ajo në Gjonaj të Prizrenit, ku po punohet tashmë me intensitet në ndërtimin e objekteve përcjellëse.
Ndërsa në Zhur dhe në Dragash faza e parë e punimeve ka përfunduar, derisa shumë shpejt do të fillohet me fazën e dytë. FFK synon të vazhdojë këtë projekt edhe me komunat tjera për të mundësuar që çdo vend ku ka më shumë se 25 lojtarë që luajnë dhe e praktikojnë futbollin të ndërtohet një fushë. Nëpërmjet këtij projekti, të rinjtë do të kenë mundësinë të shfrytëzojnë hapësirat sportive të reja dhe të ndjekin pasionin e tyre për futbollin, ndërsa në të njëjtën kohë do të rritet ndjeshmëria sociale dhe ekonomike në komunitetet ku ky projekt do të realizohet.
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
