Një milion eurot e ndara nga Qeveria e Kosovës, për vaksinim, nuk i kanë shpëtuar gjedhet e fermerëve kosovarë. Edhe pas vaksinimit atyre po u ngordhin lopët nga sëmundja gungore.
Veterinerët ngritin shqetësimin se pati dallavere në tenderit për vaksinim dhe shumë kafshë të sëmura nuk janë evidentuar fare.
Në bazë të informacioneve që ka siguruar Gazeta Fjala, thuhet se gjithë procesi ka shkuar përmes kompanive private, pa u bërë testet paraprake të vaksinave, 15 për qind të lopëve, thuhet se kanë mbetur pa u vaksinuar në tërë Kosovën.
Veterinari, Fazli Shabani, i cili pati alarmuar për këtë sëmundje thotë se ka mëdyshje për kualitetin e vaksinave të cilat u shpërndanë në mënyrë jo të drejtë.
“Në rastin e vaksinimit të gjedheve i gjithë procesi është bërë nëpërmjet operatorëve privat dhe pa asnjë testim paraprak ku me siguri për qellim kryesor kanë përfitimin ekonomik ndërsa shumë më pak atë të ruajtjes së shëndetit dhe fondit të gjedheve. Rastet e paraqitjes së sëmundjes deri në 18 ditë pas vaksinimit krijojnë hapësirë për të diskutuar rreth kualitetit të vaksinës”, ka thënë për Gazetën Fjala, Shabani.
Sipas Shabanit, furnitorët privat me vaksina, lidhnin marrëveshje me persona të papërgatitur, të cilët nga frika e gabimeve, se mos po vaksinojnë kafshët e prekura, i kanë lënë pa vaksinuar edhe të tjerat.
“Si rezultat i mungesës se profesionalizmit dhe përvojës se personave të cilët kanë kryer vaksinimin sot një numër i konsiderueshëm i gjedheve rezultojnë të pa vaksinuara”, ka shpjeguar veterinari.
AUV: Të gjitha kafshët janë vaksinuar
Mirëpo, të njëjtën nuk e thonë në Agjencinë e Ushqimit dhe Veterinës (AUV). Lamir Thaçi, zyrtar për informim në këtë institucion, thotë se nuk ka mbetur asnjë kafshë pa vaksinuar.
“Të gjitha kafshët janë vaksinuar. Deri më tani nga kjo sëmundje kanë ngordhur 986 krerë gjedhe në gjithë territorin e Republikës se Kosovës . Prej datës 06.10.2016. zyrtarisht është përfunduar vaksinimi masiv në gjithë territorin e Kosovës dhe tani jemi duke bere monitorimi e këtij aktiviteti në teren. Monitorimi po bëhet nga zyrtarët e AUV-së”, thotë për Gazetën Fjala, Thaçi.
Sipas tij, tani është duke u bërë monitorimi në terren i përfundimit të vaksinimit si dhe vlerësimi i kësaj sëmundje. Ai thotë, se posa të përfundojnë këto analiza, Drejtoria e Shëndetit dhe Mirëqenies së kafshëve do të vendos për hapjen e tregjeve të kafshëve.
“Tani ne jemi dukë bërë monitorimin ne teren të kryerjes se vaksinimit, dhe vlerësimin e situatës aktuale të zhvillimit të kësaj sëmundje. Pasi të bëhen të gjitha analizat e situatës në teren Drejtoria e Shëndetit dhe Mirëqenies se Kafshëve do të vendosë për kohen e lejimit të funksionimit të tregjeve”, deklaron zyrtari për informim në AUV.
Mirëpo për kryerjen e analizave në terren, nuk është në dijeni veterinari Shabani. Ai thotë, se vet personat që vaksinonin kafshët shpërndanin pasiguri e frikë te fermerët, që në rastin e paraqitjes së sëmundjes, pasojat t’i bartin fermerët, e jo ata.
“Nga komunikimi me fermerët, kafshët e të cilëve janë të pavaksinuara edhe sot, tregonin se atyre u ishte thënë që ‘nëse ti insiston që të bëjmë vaksinimin e kafshëve të cilat ne po i klasifikojmë si të dyshuara atëherë përgjegjësinë do ta marrësh ti, dhe nëse të ngordh e njëjta kafshë si rezultat i mos bindjes tënde ndaj këshillave tona atëherë nuk do te kompenzohesh për kafshën e ngordhur’“, tregon për Gazetën Fjala, Shabani.
Sipas veterinarit, njëherë është dashur të shpjegohet procesi i vaksinimit bashkë me efektet në mënyrë që fermerët të mos nxiteshin për vaksinimin e kafshëve. /Lorik Maxhuni//Gazeta Fjala/
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
