CIMIC-u Italian, i cili është një organizëm i Komandës së KFOR-it që merret me koordinimin e aktiviteteve civile në rajon, sot ka dhuruar pajisje në vlerë prej 8000 eurosh për Njësinë e Zjarrfikësve, Njësinë Ekoregjionit dhe atë të Pylltarisë në Dragash. Kjo ndihmë e vlefshme për komunitetin e Dragashit përbëhet nga disa pajisje si motosharrë, agregat, pompë shpinore, kositëse bari, fryese, gypa për shuarjen e zjarrit.
Drejtori i Drejtorisë për Mbrojtje, Shpëtim dhe Shërbime Publike, z.Nuhija Tairovci, ishte pranë CIMIC-it Italian në ceremoninë e dhurimit të këtyre pajisjeve dhe shprehu mirënjohjen e tij për kontributin e tyre në ngritjen e kapaciteteve të zjarrfikësve, ekoregjionit dhe të pylltarisë në këtë zonë.
Gjatë ceremonisë, ai falënderoi edhe Komandantin e KFOR-it- Komanda Regjionale Perëndim, Kolonel Mario Bozzin, për ndihmën dhe kontributin e vazhdueshëm që KFOR-i po jep për Komunën e Dragashit. Ai theksoi se kjo ndihmë e vlefshme do të ndihmojë në rritjen e sigurisë dhe të kapaciteteve të qytetarëve në raste emergjence dhe situata të ndryshme të nevojshme.
Gjithashtu, drejtori Tairovci shprehu falenderime edhe për njësinë LMT të KFOR-it Turk për angazhimin e tyre në realizimin e këtij projekti. Ai vlerësoi bashkëpunimin ndërkombëtar të KFOR-it në mbështetjen e komunitetit të Dragashit dhe në rritjen e kapaciteteve të tyre për të përballuar situata emergjente dhe rreziqe të tjera që mund të ndodhin në këtë zonë.
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
