Kryetari i Komunës së Dragashit, Bexhet Xheladini, ka mbajtur një takim të rëndësishëm me specialistin e projekteve në organizatën japoneze JICA, z. Paulo Sousa. Në këtë takim, ku morën pjesë edhe drejtori i Mbrojtjes, Shpëtimit dhe Shërbimeve Publike, z. Nuhija Tairovci, dhe shefi i Kabinetit, z. Veton Halili, u diskutua mbi ecurinë e përgjithshme të projektit të mbështetur nga JICA. Ky projekt ka për qëllim reformimin e tërësishëm të sistemit të menaxhimit të mbeturinave në Komunën e Dragashit.
Gjatë takimit, kryetari Xheladini ndau informata të hollësishme lidhur me arritjet dhe sfidat që po kalon komuna gjatë realizimit të këtij projekti. Ai gjithashtu shprehu falënderime dhe mirënjohje të thellë për partnerët e JICA-s japoneze për mbështetjen e vazhdueshme. Kjo mbështetje përfshin dhurimin e pajisjeve të ndryshme teknike për nevojat e institucioneve lokale dhe ofrimin e ekspertizës profesionale në zbatimin e reformave mjedisore.
Ky projekt është një hap i rëndësishëm drejt përmirësimit të menaxhimit të mbeturinave dhe mbrojtjes së mjedisit në Dragash, duke kontribuar në një mjedis më të pastër dhe më të shëndetshëm për qytetarët e kësaj komune. /Opoja.net/
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
