FIFA ka akuzuar Federatën e Futbollit të Serbisë për shfaqjen e flamurit me hartë të Kosovës në zhveshtoren e përfaqësueses së Serbisë në Botërorin “Katari 2022”, gjatë ndeshjes me Brazilin. FIFA të shtunën ka nisur procedurë disiplinore ndaj Federatës serbe, ndërsa vendimi pritet së shpejti, ka njoftuar agjencia e lajmeve “Associated Press”.
Shtëpia e futbollit botëror ka përmendur një pjesë të kodit të saj disiplinor që mbulon sjelljet e pahijshme, duke përfshirë gjestet, shenjat ose gjuhën fyese, si dhe përdorimin e një ngjarjeve sportive për demonstrime josportive.
Ndonëse FIFA nuk ka dhënë afat kohor për vendimin, ai pritet të merret së shpejti.
Flamuri që u shfaq në zhveshtoren e Serbisë ishte me hartë të Kosovës dhe me ngjyra të flamurit serb. “Nuk ka dorëzim” shkruan në flamurin që u shfaq edhe në stadium gjatë ndeshjes së Serbisë me Brazilin.
Federata e Futbollit e Kosovës u ankua të premten në FIFA, ndërsa kanë reaguar edhe Komiteti Olimpik i Kosovës dhe ministri i Kulturës, Rinisë dhe Sportit, Hajrulla Çeku.
Serbët kanë refuzuar të shtunën të flasin për atë flamur skandaloz.
Opojanet ka hapur kanalin në Whats App dhe ju mund të na bashkoheni për të ndjekur lajmet tona BASHKOHU KËTU.
